आजः मङ्लबार, अशोज ६, २०७७

१५ वर्ष पछि पक्राउ परे, पत्रकार डेकेन्द्रराज थापा हत्याका मुख्य आरोपित

अनलाइन कर्णाली,

२१ फागुन २०७६, दैलेख

पत्रकार डेकेन्द्रराज थापाको हत्याका मुख्य आरोपित १५ वर्ष पछि पक्राउ परेका छन् । पत्रकार थापाको हत्याका मुख्य आरोपित ४ जनामध्ये दुल्लु नगरपालिका–६ छिउडीपुसाकोटका ‘अरुण’ भनिने बमवहादुर खड्कालाई जिल्ला प्रहरी कार्यालय दैलेखले पक्राउ गरेकाे हाे । खड्कालाइ मंगलबार  नै जिल्ला अदालत दैलेखले पुर्पक्षका लागि कारागार चलान गरेको छ । प्रहरीले जिल्ला अदालतमा उपस्थित गराएपछि जिल्ला न्यायाधिस दण्डपाणी लामिछानेको ईजलासले पुर्पक्षका लागि थुनामा राख्ने आदेश दिएको हो । उनी फरार रहेका थिए ।

जिल्ला अदालतका सुचना अधिकारी विनोद आचार्यले प्रहरीले तत्कालीन माओवादी कार्यकर्ता खड्कालाइ जिल्ला अदालतमा उपस्थिती गराएपछि मुल्तवीमा रहेको कर्तव्य ज्यान मुद्धा जगाई मंगलवार नै पुर्पक्षका लागि थुनामा राख्ने आदेश भएको जानकारी दिए । हत्या आरोपित खड्कालाई कैलाली जिल्लावाट पक्राउ गरि अड्डासार गर्दै दैलेख ल्याईएको जिल्ला प्रहरी प्रमुख डिएसपी हरिवहादुर ओलीले बताए ।

जिल्ला अदालत दैलेखले २०७१ मंसीर २१ गते फरार भनिएका खड्कासहित ४ जनालाई हाजिर भएका वा पक्रिएका वखत वा अवधी पुगेपछि जगाई कारवाही र किनारा गर्ने आदेश गरेसँगै फरार उनलाई प्रहरीले पक्राउ गर्न सफल भएको हो । २०६१ साउन २७ गते नौमुलेको द्वारीमा माओवादी कार्यकर्ताहरुले मरणासन्न हुने गरी कुटेपछि सास छँदै खाल्डोमा गाडेर पत्रकार थापाको हत्या गरेका थिए । लामो खोजीपछि बल्ल २०६५ को वर्षायाममा नौमुले गाउपालिकामा पर्ने साविकको द्धारी गाविस–१ स्थित नेरा निमावि नजिकको जंगलमा पत्रकार थापाको कंकाल फेला परेको थियो ।


ताजा समाचार