25 February 2020|   मङ्लबार, फाल्गुन १३, २०७६

‘भारतसँगको खेलमा पाकिस्तानले यी गल्ती दोहोर्‍याउन सक्दैन’

Online Karnali
प्रकाशित मितिः शुक्रबार, जेष्ठ ३१, २०७६       |  

एकदिवसीय विश्वकप क्रिकेटअन्तर्गत बुधबार भएको खेलमा अष्ट्रेलियाले पाकिस्तानलाई ४१ रनले पराजित गरेको थियो ।

हारपछि पाकिस्तानी क्रिकेट टिमका कप्तान सरफराज अहमदले यदि भारतलाई हराउने हो भने फिल्डिङमा सुधार गर्नुपर्ने बताएका छन् । भारत र पाकिस्तानको बहुप्रतिक्षित खेल आगामी आइतबार अर्थात् जुन १६ मा म्यानचेस्टरको ओल्ड ट्राफोर्डमा हुँदैछ ।

पाकिस्तानको खराब फिल्डिङका कारण आसिफ अलीले स्लिपमा अष्ट्रेलियाका कप्तान आरोन फिन्चको क्याच छोडेका थिए । जुन समय फिन्च ३३ रन बनाएर खेलिरहेका थिए ।

त्यसपछि फिन्चले ८४ बलमा ८२ रन बनाए र अर्का ब्याट्सम्यान डेभिड वार्नरसँग एक सय ४६ रनको साझेदारी गरे । डेभिड वार्नरको एक सय सात रनको मद्दतमा अष्ट्रेलियाले तीन सय सात रनको योगफल तयार गरेको थियो ।

तीन सय आठ रनको लक्ष्य पछ्याएर मैदानमा उत्रिएको पाकिस्तान टिम ४५ दशमलव ४ ओभरमा दुई सय ६६ रनमा समेटियो ।

खेल सकिएपछि सरफराजले पत्रकारसँग भनेका थिए, ‘जब दुई राम्रा टिम खेलिरहेका छन् भने फिल्डिङले निकै अन्तर गर्दछ । खराब फिल्डिङका कारण हामीले रन बनाउन दियौँ ।’ यदि पाकिस्तानले भारतलाई हराउने हो भने यति ठूलो गल्ती गर्न नसक्ने सरफराजले बताएका छन् ।

‘हाम्रो फिल्डिङ धेरै राम्रो छैन र भारतसँगको भेट अघि हामी मेहनत गर्नेछौँ । भारत मजबुत टिम हो र भारतसँग यस्तो गल्ती जारी राख्ने हो भने खेल जित्ने मौका नै मिल्दैन’, सरफराजले भने ।

पाकिस्तानले अष्ट्रेलियाविरुद्ध राम्रो सुरुवात गरेको थियो र जित्नको लागि तीन सय आठ रन चाहिएको थियो । पाकिस्तानले २६ ओभरसम्म मात्र दुई विकेट गुमाएर एक सय ३६ रन बनाएको थियो । तर त्यसको तीन ओभरभित्र इमाम-उल-हक, मोहम्मद हफीज र शोएब मलिक आउट भए ।

सरफराजले भने, ‘हामीले राम्रो सुरुवात गरेको थियौँ तर साझेदारी गर्न सकेनौँ । हामीले १५ बलभित्र तीन विकेट गुमायौँ र त्यही नै खेलमो टर्निंग प्वाइन्ट थियो ।’

अष्ट्रेलियाविरुद्ध ५५ रन बनाएका इमामले पनि भारतसँगको खेलमा आफ्नो पूरा क्षमताका साथ खेल्ने बताएका छन् ।

विश्वकप क्रिकेटमा भारत र पाकिस्तान अहिलेसम्म ६ पटक आमने-सामना भएका छन् । जसमा ६ वटै खेल भारतले जितेकाे छ । विश्वकप क्रिकेटमा पाकिस्तानविरुद्ध भारत सधैँ हावी हुँदै आएकाे छ ।

Loading...

Have any Question or Comment?

Leave a Reply

Your email address will not be published. Required fields are marked *